Чытальная зала

Пампуй новае каталiцкае прылажэнне "Малiтоўнiк"!

МАЛІТОЎНІК

Пытаннi i адказы

«Стою на дороге и не знаю куда пойти: в церковь или в костел? Ни разу не была ни там ни там. От боли в душе не знаю, куда деться. Как зайти, когда ...»

Парафіяльны май выдаўся надзвычай багаты. Колькі дзён таму была асвечана наша капліца, пасля многія вернікі атрымалі сакрамант канфірмацыі, а зараз рыхтуемся адразу да некалькіх важных падзей: першая камунія, свята Спаслання Духа Святога.

 

Акрамя таго, сёлета святкуем 150-годдзе з дня нараджэння святой Уршулі Ледухоўскай. У гонар маці-заснавальніцы кангрэгацыі сясцёр уршулянак Сэрца Езуса Канаючага 20 мая ў парафіі распачалі навэнну. Пра дзейснасць заступніцтва святой Уршулі Ледухоўскай распавяла асістэнтка генеральнай маці-настаяцельніцы сястра Аляксандра Кмецяк.

 

Святая Уршуля любіла казаць, што святы — гэта сябар, які з неба лепш бачыць усе нашы патрэбы і клопаты. Падчас зямнога жыцця Уршуля Ледухоўская адрознівалася асаблівай чуласцю да патрэб іншых людзей. Маем мноства сведчанняў, што гэтую чуласць яна захавала і як наша святая заступніца ў нябёсах. Яна дапамагае ўсім, хто звяртаецца да яе са сваімі просьбамі.

 

Пра плён дапамогі святой апавядае асобнае выданне: у ім сабраны больш за 400 сведчанняў людзей з розных частак свету, якія атрымалі праз яе заступніцтва розныя ласкі.

 

Варта адзначыць, што святая Уршуля прысвяціла жыццё асаблівай апецы над дзецьмі і моладдзю. Яна і зараз асаблівым чынам апякуецца імі.
Прыгадаем некаторыя сведчанні аб заступнітве святой.

 

Найперш гісторыя, якая здарылася некалькі год таму. У снежні сёстры-ўршулянкі падчас падарожжа ў Варшаву трапілі ў аварыю ‒ сутыкнуліся з аўтамабілем, у якім ехалі маладыя сужэнцы. Пакуль чакалі паліцыю, многа размаўлялі. Урэшце мужчына распавёў, што пара мае праблемы з зачаццем дзіцяці. Лекары сцвярджалі, што жанчына не зможа мець дзяцей. Тады сястра прапанавала сужэнцам абразок з навэннай да святой Уршулі, заахвоціўшы іх да малітвы аб нараджэнні дзіцяці і паабяцаўшы, што будзе маліцца таксама і сама.

 

Усяго праз месяц пара прыехала да сясцёр ‒ паведаміць, што чакаюць дзіця. У верасні ў іх нарадзіўся сынок. Гэтая сям’я адведвае сясцёр да сённяшняга дня: як кажуць, маленькі Бруно прыязджае да цёці Улі. Праз некалькі гадоў зноў задумаліся аб дзіцяці ‒ і звярнуліся да святой Уршулі. У трэцюю гадавіну з дня нараджэння Бруно сям’я папоўнілася яшчэ адным дзіцяткам.

 

Многія людзі просяць святую Уршулю вымаліць для іх ласку бацькоўства, вераць у яе дапамогу, нават калі з пункту гледжання медыцыны гэта немагчыма. І плёнам іх веры ёсць шматлікія сведчанні.

 

Вось сведчанне жанчыны з Англіі. Падчас цяжарнасці выявілася, што дзіця мае шчыліны ў галаве. Медыкі настойвалі на перарыванні цяжарнасці. Але ў гэты цяжкі момант уся сям’я малілася навэнну да святой Уршулі, просячы аб жыцці і здароўі для дзіцяці. І нарадзіўся абсалютна здаровы хлопчык.

 

Яшчэ адно сведчанне расказвае пра аздараўленне шасцігадовай дзяўчынкі Вікторыі з Украіны. Адна з сясцёр прапанавала маліцца навэнну да святой Уршулі ў інтэнцыі аздараўлення дзіцяці. Яе падтрымалі сёстры з кляштара ў Камянцы-Падольскім. У хуткім часе хвароба запаволілася і пачалося паляпшэнне. З таго часу прайшло ўжо 9 гадоў: Вікторыя добра бачыць і не карыстаецца акулярамі.

 

У Аргентыне брат адной з уршулянак ехаў на матацыкле і трапіў у вельмі цяжкую аварыю. Тым не менш ён не атрымаў аніякіх пашкоджанняў. Як сцвярджаў сам, яго ўратавала святая Уршуля ‒ ён заўсёды меў з сабой яе абразок.

 

Словы падзякі за дапамогу святой Уршулі прыходзяць ад людзей з розных частак свету. У Аргентыне адна жанчына пастаянна моліцца навэнну на знак падзякі за выратаванне свайго дзіцяці ад белакроўя. Іншая жанчына даслала ліст са сведчаннем, што праз заступніцтва святой яе муж ужо 3 гады не ўжывае алкаголю і ў сям’і з’явілася згода.

 

Вось толькі некаторыя сведчанні ‒ няхай яны заахвоцяць да малітвы праз заступніцтва святой Уршулі ў самых розных інтэнцыях. Бог дае нам на дапамогу святых. Святыя не дапамагаюць толькі ў тым выпадку, калі мы іх аб гэтым не просім. Заахвочваю вас да малітвы і спадзяюся, што ў хуткім часе з’явяцца сведчанні аб дапамозе святой Уршулі з Беларусі і з вашай парафіі.

 

Навэнна да святой Уршулі Ледухоўскай

О Езу, Твайму Сэрцу даручаю…(назваць інтэнцыю)

Узглянь і учыні тое, што падкажа Табе Тваё Сэрца. Дазволь Твайму Сэрцу дзейнічаць. О Езу, я разлічваю на Цябе, давяраю Табе, цалкам Табе аддаюся. У табе я ўпэўнены. О Сэрца поўнае любові, давяраю Табе без рэшты, бо сам з сабе я схільны да ўсялякага зла, але ва ўсім спадзяюся на Тваю дабрыню. Амэн.

Дзеля заслугаў нашага Пана Езуса Хрыста прымі, о Божа, малітвы якія ўзносяцца да Цябе праз заступніцтва святой Уршулі Ледухоўскай, вернай паслядоўніцы дабрадзенасцяў Найсвяцейшага Сэрца Твайго Сына і ўдзялі нам ласкі, якой з даверам просім. Амэн.

Найсвяцейшае Сэрца Езуса змілуся над намі.

Святая Уршуля маліся за нас.

(навэнна-малітва, якая трывае 9-дзён)

 

Тэкст Вольга Жвірко

 

Чытайце таксама:

   Кангрэгацыя Сясцёр Уршулянак Сэрца Езуса Канаючага (уршулянкі)

  150 год з нараджэння св. Уршулі