Аазіс… Няма дакладнага адказу на пытанне “што гэта?”, але ёсць розныя думкі на гэты конт. Для кагосьці гэта сезонныя моладзевыя рэкалекцыі, для кагосьці лагер для каталіцкай моладзі, а для кагосьці і ўвогуле другі дом…

У мінулым годзе арганізатары Аазісу пайшлі на своеасаблівы эксперымент і прапанавалі моладзі святкаваць Новы год разам у Оршы. Ідэя аказалася настолькі паспяховай, што і на гэты раз вялікая аазісная сям’я зноў сабралася разам. І ўсе гэтыя пяць дзён сталі для ўдзельнікаў сапраўдным святам! Мы рабілі адзін аднаму цацкі-падарункі, рыхтавалі выступленні да навагодняй імпрэзы, абмяркоўвалі канферэнцыі на групках і прасілі Бога на малітвах дапамогі ў захаванні чыстасці. “Чысціня” – менавіта такой была тэма гэтага зімняга Аазісу. Тэма важная і актуальная для падлеткаў і моладзі.

Гэты зімовы Аазіс быў азначаны своеасаблівым духам еднасці і сяброўства, быў напоўнены малітвамі і перажываннямі, быў напоўнены сур’ёзным роздумам над тэмай уласнай чысціні - духовай і фізічнай. Але ж гэтыя словы мала што могуць расказаць пра гэты час. Каб зразумець што такое Аазіс і даць уласнае тлумачэнне – ці то рэкалекцыі, ці то лагер, ці то другі дом – туды трэба прыехаць.

Тэкст Паліны Грыб здымкі Марты Пратасевіч